政府日前提出多項民生政策措施，包括會研究推行「劏房」租務管制，以及進一步增加過渡性房屋。運輸及房屋局前局長張炳良尋日出席一個大學研討會時提到，唔同當年引入「印花稅」時能夠由政府主導，訂立租務管制必須經由立法會通過後方能生效，又認為難度會係喺點樣界定「劏房單位」。
需法律上定義 憂又遭立會「卡住」
張炳良話由於只有劏房單位會被納入作租務管制，但「劏房」本身並冇法律定義，所以政府擬訂草案時最大挑戰會係點樣喺法律上定義「劏房」。佢仲講到唔單止劏房業主會想盡辦法鑽法律漏洞，而喺立法會審議時，必定會有議員反問點解唔管制晒所有單位？佢亦引用現屆政府上任時提出要引入?「物業空置稅」為例，指政策至今兩年幾仲未落實，因為個草案仲卡咗喺立法會。
至於過渡性房屋方面，張炳良指政府自二○一○年起已有研究，但上屆政府一直缺乏額外?閒置土地，因此並冇落實。佢又話雖然現屆政府表示未來三年會推出一萬個過渡性房屋單位，但現時劏房住戶有近九萬個，話政府可以做得更多喎。