2017-05-02
明報
【明報專訊】上星期五晚邵博士到我公司做facebook Live，當時大家都知道中原指數又破頂，邵博士當然開心，話佢又預測準確，言下之意，即是話我預測錯誤，我話，我對今年樓市預測是先升後跌，邵博士的預測是先升後升，現在大家都預測準確，暫時打成平手，我沒有失落，邵博士亦毋須太開心，在鏡頭面前，半點也不能退讓，否則，整個Live Show就有佢講，冇我講。
話題一轉，邵博士立刻話我既然睇淡樓市，點解小兒又用4000幾萬買樓，邵博士的說話已經厚道，不少人話我既然睇淡樓市，點解唔將手上物業全部賣走，我話小兒換樓，將現在1000呎單位換了一個2000呎單位，是跑馬地名廈，呎價只是兩萬（沙頭角都要成萬蚊呎啦！），如果呎價5萬，我會叫小兒慎重考慮。
上半年看升 我並無看錯市
話題再轉到利息，邵博士睇美國沒有能力加息，這點我不明白，耶倫連加息時間表與幅度都講明晒，點解咁多分析員仲唔相信，原來不但香港政府沒有信用，連美國政府都沒有信用，如果美國唔加息，一定是發生了不可抗力大件事，只有極壞消息出現，美國才不會加息，所以，我情願美國加息。
不信政府數據 無法做分析
當日早上，房運局再次宣布未來三至四年供應量，由9.4萬伙增加至9.6萬伙，邵博士話唔相信政府可以做到，同樣情况，政府將供應量的時間表公報，如果唔信，根本冇嘢好講，對於某些分析員來說，唔信就是分析。
邵博士話以他多年在國內營商所了解，有無窮無盡購買力從國內湧至，多付30%辣招稅根本不是問題，其實，的確有不少內地人已經在港置業，如果他們現在選擇離開，會有相當可觀利潤，在以往，只是單向行車，現在則變成雙向，有內地人到香港買樓，亦有內地人賣樓，我同意買樓比賣樓的人多，但增長幅度就大幅低於以往，否則，地產商就不會借錢給買家，做分析，一定要根據理據，不能夠以個人意見為準則，這點就不是太多分析員可以做到，包括在下。
紀惠集團行政總裁
[湯文亮 敢說亮話]