2017-04-24
明報
【明報專訊】中原指數九連升，我照例會收到不少電話，問我現在是否應該買樓，或者問幾時可以買樓，我都唔知點答，老實說，我現在只夠膽叫人唔好賣樓，不單是自住物業，甚至現正收租的都唔好賣，因為即使賣走的時候高於市價，但如果要再買樓，則要付那些乜稅物稅，就會變成新單位的買入價高於賣出單位的售價，既然如此，一動不如一靜，直至政府取消15%印花稅的時候再考慮，這已經是我的極限答案。
現在我的膽唔好講話生毛，直頭細了很多，不但唔敢叫人買樓，亦唔敢叫人唔好買樓，我會學老汪講，買有風險，不買也有風險。
如果沒有SSD我會叫人買樓
叫人買樓的風險是未來的，倘若買樓之後利息上升，供應增加，經濟下滑，樓價一瀉而下，新買樓的業主因為要付SSD（額外印花稅），想將單位賣走也不可以，他們會眼白白睇住樓價下跌，如果今日我提議那些業主買樓，他日一定會怨恨我，他們多數會話，當時並沒有真正打算買樓，但聽到我的提議才買樓，誰不知買樓才有風險，既然知道答案，我唔夠膽叫人買樓，但我亦唔夠膽叫人唔好買樓，如果我提出這個建議，就立刻會被人話不買才有風險。
賺了10% 我會叫人賣樓
不買的風險是現在的，如果叫人現在唔好買樓，到下星期五，中原指數再次破頂，一定會被那些人冷言冷語話，唔買樓，指數又升咗啦，都唔知道會升到幾時，全世界的人都話升，買樓點會有問題，他們會自怨自艾話自己唔好彩，有咁多專家都唔問而偏偏問我，倘若問任何專家都會毫不猶豫叫人買樓，我又知道答案，點夠膽叫人買樓或者唔買樓，其實，買與不買的風險是存在於不同時間，如果沒有SSD，我會叫人買樓，待樓價升了10%之後，我又會叫人賣樓，如果有人聽我講買樓，無論他們以後是否聽我講賣樓，我都是贏家，如果他們賣樓，立刻有利潤，一定唔會怪我，如果不賣樓而他日樓價下跌，我就會話已經提醒要賣樓，只是他們貪勝不知輸，又怎能夠怪我呢！
紀惠集團行政總裁
[湯文亮 敢說亮話]