2017-03-27
明報
【明報專訊】上星期五中原指數又破頂，我當然收到不少攞景WhatsApp，問我幾時轉軚，仲話老施轉得快，好世界。其實，老施掌握咁多市場數據，1個月前才轉軚其實是轉得慢了，我亦知道點解樓價只升不跌。
不過我唔敢轉軚，因為我轉軚會有反效果，政府會認為我在煽風，有機會出新辣招，或者加重現有辣招印花稅或者延長時間，不過，就算我轉軚，估計唔需要太耐又要再轉軚，因為，就算李嘉誠先生都只是話睇唔到樓價在這一兩年會跌，但我估計意思是兩年之後，樓價會跌，不過，李超人一定唔會講出來。
估計樓價兩年後會跌
有人會認為兩年太久，只爭朝夕，最近樓價點解會猛升，中原指數又破頂，觸動了政府官員的神經線，他們會不會再出招，其實，這亦是我擔心的地方，官員們可能不明白，政府繼續出招，樓價會繼續升，辣招令到只得一個住宅單位的業主知道，千祈唔好賣走自住單位，唔好以為辣招可以壓低樓價，令他們可以在兩三年後可以用低價回購相若或者更大單位，沒有單一業主放售他們的物業，供應減少了很多，樓價已經處於不跌狀態，而持有多個物業的業主，知道賣走了物業之後，再買物業要付很多印花稅，亦傾向不出售，或者要高於市價很多才會出售。
港府不宜再出辣招
此外，市場上的高價成交之中，有很多買賣都是以公司轉讓形式交易，令市民有錯覺樓價不斷創新高，只升不跌的神話繼續，如果那些交易撇除應付辣招印花稅，其實樓價比市價低很多。
只升不跌神話會繼續，直到供應量達到氾濫水平，樓價才會急跌，以現時供應速度，今年底便會初見成效，不過，在期間政府千萬不要因為樓價飈升又再出招，官員們並不知道，是辣招令到樓價飈升。
紀惠集團行政總裁
[湯文亮 敢說亮話]