2017-01-06
東方日報
一向以來，農曆新年後就係新盤小陽春，點知近期啲新盤高開，真係「春早發」成咁？紀惠集團行政總裁湯文亮尋日話有得解，呢個玄機係關啲黃花魚事?!
佢話細時住澳門，有次為做暑期作業，就跟啲漁船出海（點解做暑期作業要出海？等絲絲下次再問過佢）。當時大部分漁船都喺內港等魚訊，一聽到話珠江口岸有大群黃花魚，隻隻漁船就爭先恐後啟航，幾咁危險。湯雖見識到「行船爭解纜」?場面，但唔明點解，船家話捉完魚你就知。
嗰次出海作業好順利，佢哋仲係頭幾隻船返，返到內港，魚欄買手已經等緊，佢哋啲魚賣價相當理想，船家仲送咗兩條生猛黃花魚畀阿湯添。隔兩日，湯再去魚欄，見遲返嗰啲漁船，唔止要船員自己擔魚落魚欄，啲價錢仲賣得麻麻。原來愈遲返，啲漁穫愈唔值錢。
今年小陽春勢必早到
湯話，由於嗰一成半新印花稅，新樓市場已經半停頓咗一排，想買樓?人已經心急如焚，市場上積聚咗批購買力。大部分地產商可能諗住等農曆新年後?小陽春先開盤，誰不知新地偷步，喺無人爭下提早開咗個紅盤！湯話，其他地產商睇到，嚟緊就會爭住開盤，小陽春自必然提早。原來係「行船爭解纜，樓盤我賣先」咁解！
余絲韻