2017-02-28
明報
【明報專訊】我去了北歐旅行，本來暫時不評論香港樓市，但想做都做唔到，落機冇耐，收到無數短訊，話施永青轉軚，從年初預測樓市下跌接近一成，到前日在記者會上預測未來一年半會升兩成。我早已打算唔覆任何提問，但當中有一個訊息話施永青、林一鳴，以及小弟都是預測今年樓市先升後跌，現在老施過了我們兩人一棟，朋友講得咁坦白，我有必要了解究竟老施點解會轉軚。
我一睇張相片就知道原因，老施在記者會上發言，左有昇哥，右有傑哥，我並不是說他們兩人挾持老施發言，而是施永青昨日代表中原地產預測樓市，即使他不同意，他亦要以中原地產利益為依歸，情况好似一個地區民選議員一樣，要以地區利益反對國家政策。
發言乃代表公司意見
况且，中原有足夠數據支持樓市預測準確性。不過，伙計要老施今日的我打倒昨日的我就有點那個，但老施為人隨和，唔會太計較，而且昨日還昨日，今日是今日，正所謂昨日之日不可留，如果我察覺到樓市有急劇轉變，我一樣會轉軚，但我始終認為，真正的老施並沒有轉軚。
團友問我會不會轉軚，我話暫時唔會，遲吓就唔知，因為影響樓市的因素尚未出現，利息還未開始真正上升，雖然政府的供應已經到位，並且陸續登場，但地產商仍然按樓不發，新盤供應仍未進入市場，現在只有零星供應，造成樓價上升之後，估計會有大量新樓盤推出市場。
三大因素不變 筆者不會轉軚
雖然有人話內地走資，令到香港樓價飈升，其實，走資問題國家已經關注，影響香港樓價程度亦降低，如果上述的情况按照預測而行，我唔敢轉軚，除非政府話以後會大幅減少土地供應，耶倫話不加息，國家又容許走資，上述3種可能只要出現一種，我都會轉軚。
紀惠集團行政總裁
[湯文亮 敢說亮話]