2016-12-07
明報
【明報專訊】曾經有不少人問我，做炒家最緊要的戒條是什麼，我話無論什麼投資，都一定有贏有輸，千祈唔好輸打贏要，即是輸就打人，贏就玩人，所以，第一戒條應該是食得鹹魚抵得渴，否則就沒有代理會介紹筍盤。做物業投資，如果唔靠物業代理介紹，又何來咁多筍盤。
現在有不少投資者因為新印花稅制，轉而投資車位，代理話細細粒容易食，他們沒有講錯，不過，只講了一半，車位冇錯是細細粒容易食，不過難消化，一般車位所牽涉的金額不大，買家甚少將車位上會，所以，即使在成交前未能摩出，都唔會撻訂。
車位易食難消化
不過，成交之後要搵賣家或者租客就很艱難，如果沒有足夠實力，一定要在成交前或者簽正式買賣合約摩走，就難上加難，就算要撻訂，絕對不能怪責物業代理，打人更加唔應該。
我相信有人會認為，如果物業代理沒有把握摩售，就唔好同個客講，老實說，如果有十足把握，為何不自己買，何須介紹畀其他人？有兩位師奶，一位買車位摩售不成，就要打物業代理出氣，另外一位在去年買了一個細單位，其後細價樓急跌，那位師奶亦有損失，當時她受到不少人取笑，話有專家已經提出警告，細價樓會爆煲，她並沒有怪責那位物業代理，反而叫那些專家食糞，有自用需要而又負擔得起，點解唔可以買樓？
輸錢不要輸風度
兩位師奶相比，誰較有風度，唔需要我多講，賭錢同炒賣都是一樣，輸都要輸得有風度，為了幾萬元損毀形象，是相當不值得的，如果驚輸，就好似做雞蛋仔的店員對排隊的人講，唔買就唔使等，唔炒就唔會輸。
紀惠集團行政總裁
[湯文亮 敢說亮話]