2016-11-04
明報
【明報專訊】有老友見近日樓市急升，恐怕年輕人不顧個人能力以高價上車，叫我寫幾篇文章勸喻他們現在並非上車好時機，我問老友是否想陷我於不義，去年我鼓起勇氣才夠膽寫「細價樓爆煲論」，已經泄露天機，所以我早早認輸，希望上天唔好懲罰，否則就要用幾十萬擺認輸宴。
上天亦待我不薄，細價樓的確曾經向下調整20多個巴仙，之後我亦調整預測，鼓勵打算買樓的人啱價就買，如果唔買，就不能確認因樓價下跌所得到利益，所以，我亦發表過一篇〈「不賭是贏錢」並不完全正確〉的文章，如果我堅持樓價會繼續下跌，我想我行街的時候一定會被人駡，仲慘過兩位宣誓唔到的議員，今日叫我寫叫人唔好買樓的文章，打死我都唔會寫。
若有需要 現在買樓亦冇壞
老友又話，既然唔敢寫叫人唔好買樓，不如寫叫人買樓，我話，這些事已經有很多人做了，唔需要我做，而事實上，如果有需要的話，現在買樓亦冇壞，「需要」當然是指自住，投資並不算是「需要」。况且，懂得買樓投資的人有自己的一套理論及計算方法，唔需要別人教他們，所以，現在我寫有關地產投資文章，都只會提及未來供應量、利息走勢，政治及經濟環境會不會轉壞，應否買樓賣樓就留待大家自己做分析，根據各人的需要而定，我唔夠膽講太肯定的說話。
香港真的是很奇怪，好似樣樣都唔好，連香港大學排名都跌出百位之外，但內地人及資金不斷湧入，想截都截唔到，令到樓價飈升。反觀新加坡，世界指標排名榜起碼有一半係排第一，又唔知點解，不但樓價年年下跌，連私人欠債比率已經上升至一個令星洲政府害怕的地步。這點我的確不明白，但我知道，倘若香港政治形勢好轉，樓價的表現會如何。因此，我的確唔夠膽寫叫人唔好買樓的文章。
紀惠集團行政總裁
[湯文亮 敢說亮話]