湯文亮：港式茶餐廳銷售策略

【明報專訊】有老友投到一個流動餐車牌照，稍為問我意見，我同老友講，問我同問道於盲分別不大，而且，講講下又會講到香港地產，講飲講食我還略懂一二，怎樣經營我就一頭霧水，老友不厭其煩叫我隨便講一個字，好，就講一個字「多」，老友聽到之後話多謝。 老友明白，他同行的友人不明白，問老友我的意思是不是多謝，老友話唔係，如果用一個字講多謝就是「謝」，不是「多」，多就是香港文化，或者是港式茶餐廳文化，大家入到任何一家茶餐廳，食物選擇是五花八門，莫講話全中國各地，甚至很多國家食物都列入茶餐廳菜單之內，這種港式茶餐廳文化現在普及至全世界。 款式多取勝 精品只需兩三款 不過，選擇雖然很多，但精品只得一兩款，有茶餐廳以一杯無冰凍奶茶，一個菠蘿鮮油包賺到盤滿砵滿，茶餐廳文化就是選擇一定要多，但精品只有兩三款，或者，其他選擇亦有機會給顧客受落，所以，選擇多是港式文化。 亦有老友曾經問我點解要寫咁多文章，我知道老友真正意思，所以我話生理缺陷問題，我口齒不伶俐，唯有寫文章表達出來，其實真正的意思是港式茶餐廳銷售策略，以「多」取勝，在過去六七年，我寫超過5000篇文章，只有兩三篇爆紅，去年有〈細價樓爆煲論〉，最近就有〈睇樓市不如聽樓市〉，老實說，我都沒有預計這兩篇爆紅，或者，因為我寫得多，總會有一兩篇爆紅。 地產商賣樓文化「細」同「多」 地產商的新樓銷售策略亦來自港式茶餐廳文化，但更為進化，是兩個字，「細」同「多」，單位要細，付款辦法要多，如果樓宇唔細，香港人又怎能夠買得起，但付款辦法要多，令到打算買樓的人要細心考慮，揀到一款適合自己的付款辦法之後，就唔會輕易放棄，所以，港式茶餐廳文化揚威世界，是有其道理。 紀惠集團行政總裁 [湯文亮 敢說亮話]