2026-09-11
明報
【明報專訊】星期四早上去到茶餐廳，有客人話問銀行借錢買樓，他本來以為以自己條件、收入，應該是十拿九穩，點知銀行唔批按揭，銀行回覆是他的條件無問題，但睇唔到他的還款紀錄，以現時環境，銀行唔敢借。
客人提及的還款紀錄，令我想到在外國讀書時，經濟101第一堂，教授大學內有銀行可以向每一名學生借出1000元，分8期，學期完畢還清，教授話，這是大家將自己信用提升的好機會，只要按時還款，日後有需要查信用的時候，結果最低限度都是優良。不過，有學生唔願意咁做，他們認為除了無謂的利息支出之外，外人或者會覺得他們無錢，連1000元都要問銀行借。
我回港之後做物業投資，每一次買樓都問銀行借到盡，再將十幾個巴仙借到的錢做定期，銀行見多做生意，都非常樂意借錢畀我，萬一供唔上，銀行亦容許我用定期供樓。不過，有不少人話我傻，定期利息收入一定比供樓利息低好多，無端端益了銀行；老實說，如果唔益銀行，銀行又點會借錢畀你。
在學術上來說，可以問銀行借多啲錢，即是信用額度提高，有錢做定期即是有備用信貸，兩者皆有利貸款人。不過，就會損失多少利息，格局唔夠，梗係借少啲唔做定期；格局夠就會借多啲，做定期，與銀行雙贏。
紀惠集團行政總裁
[湯文亮 茶餐廳手記]