【Emily】同何永賢落區 李慧琼提重推租置

【明報專訊】香港五年規劃公布在即，政商界紛紛提倡議，例如民建聯、公屋聯會等提倡重推租置。身兼民建聯九龍中議員嘅立法會主席李慧琼噚日喺社交媒體提到，房屋局長何永賢同團隊應邀到愛民邨視察，佢亦藉此向局長提出對五年規劃同房屋政策嘅意見，包括將「逐步提高本地居民自置居所比例」納入中長期政策目標，又建議喺審慎、自願原則下，研究部分成熟屋邨重推「租者置其屋」。 睇番李慧琼今年初喺立法會主席選舉論壇承諾，如果當選「原則上唔會就公共政策發表個人意見」，因為主席角色代表整體立法會。李慧琼噚日回覆Emily話，五年規劃係香港大事，佢作為立法會主席經常收到各界市民意見，有責任向政府表達，佢向局長講嘅唔係個人意見。 選主席時允不談公共政策意見 李慧琼又建議增加居屋同其他資助出售單位供應，研究為青年及中產家庭預留一定比例，同時優化分配機制。佢喺帖文亦提到，何永賢同九龍城地區團隊及街坊就愛民邨同何文田邨管理、環境衛生、維修設施、改善排水、無障礙設施同長者支援等議題交流，向局長反映居民意見同訴求，亦關注到電動車充電配套、智慧安居系統、屋邨管理、馬頭圍邨重建後社區規劃同公共設施承載力等問題。局方送贈已被超強颱風「樺加沙」吹塌、樹齡超過50年嘅愛民邨印度橡樹樹幹製成嘅書籤同杯墊。