2026-09-03
明報
【明報專訊】星期三早上去到茶餐廳，聽到有客人話去年有一個本來由內房持有的地盤，發展成本是33億元，後來變成銀主盤，最終由接管人以12億元買入，接管人剛剛以45億元售出，賺到阿媽都唔認得。那家內房就慘啦，本來應該贏，但現金流不足，最後輸到大大鑊。客人話唔明白，咁筍的盤，好似唔見在市場放售，否則客人應該收到消息。
老闆話，那些由接管人出售的樓盤，一般代理都無興趣做，雖然接管人出售的物業，絕大多數都低於市價，但接管人付很少佣金，沒有重賞，何來勇夫，所以，接管人出售的物業，很多時都由接管人或有關機構買返。由接管人出售的物業已經低價，如果由接管人買返，價錢更加殘，才會出現12億元買入，一年後45億元賣出的筍盤。
老闆可能唔知道，該物業是由內房持有，唔知道接管人不但可以賣，而且仲可以買，接管人應該是銀主，當然希望賣走接管物業，收返啲貸款，乾手淨腳。不過，如果欠債太多，即使賣走接管物業都唔夠還債，不如自己買返，而且會將樓價有咁低壓到咁低，日後如果以高價賣走，不但可以收返全部欠款，而且仲狠狠賺一筆。所以，由接管人賣的物業唔值錢，買的更加唔值錢。
紀惠集團行政總裁
[湯文亮 茶餐廳手記]