2026-08-17
明報
【明報專訊】星期日早上去到茶餐廳，有客人話本來對那些專門爆別人私隱的YouTuber好反感，香港的經濟咁差，或多或少都與他們有關，他們開宗明義講邊個投資者唔掂，銀行想唔call loan都唔得，否則，如果出現問題邊個孭？不過，他們的解釋是大家都是搵食，如果唔爆別人私隱，甚至要老作，邊度會有人畀會費參加他們的頻道，似乎是說得通。不過那些YouTuber大多數唔敢公開自己身分，無謂惹上官非甚至俾人打。
自從爆了旅遊KOL小斯用1.368億元買一個豪宅單位自用，就算銀行可以借七成，小斯都要畀4000萬元，大家都是做YouTuber，點解小斯可以搵咁多錢？客人表示，現在反而非常佩服那些爆別人私隱的YouTuber，為了爆別人私隱寧願自己收入大幅減少。不過有一些唔明白，那些爆別人私隱的頻道都很受歡迎，但點解無廣告或者贊助商，如果小斯無贊助，一定唔會搵到咁多錢。
老闆話，那些爆別人私隱的YouTuber連自己的名字也不敢公開，試問邊度會有廣告或者贊助，生意人明白，做生意就算無朋友都唔好有敵人，在那些專爆別人私隱的YouTube頻道落廣告，容乜易俾那些被爆的人控告。老實說，那些被爆的人亦不是什麼善男信女。若明知有這個危險，仍然要惹上官非落廣告，應該唔係生意人，爆別人私隱的YouTube沒有廣告，沒有贊助，又點會買到豪宅。
紀惠集團行政總裁
[湯文亮 茶餐廳手記]