2026-07-30
明報
【明報專訊】星期三早上去到茶餐廳，有客人話今次捉到鹿唔識脫角，在過去一年，樓市低迷，睇啱幾個單位，打算買返嚟收租，於是搵相熟物業代理做嘢，點知代理話業主非常等錢使，不但可以鋤價，而且可以鋤得很深。客人提醒代理，適可而止就好啦，最緊要買到，代理話唔使擔心，一定可以買到，結果買來買去，一個都買唔到，客人激到扎扎跳。
老闆話，過去兩年，如果持有多個物業的業主到茶餐廳食嘢，大多數是愁眉苦面，由於銀行大幅降低估值，即是業主準時還款，從不拖欠，銀行依然call loan call到失暈，被迫要賣走一些優質物業，質素差些少都賣唔出，而代理都知道業主有這樣的困難，如果他們有客，一些會鋤業主鋤得好狠。不過，不能夠話代理做得不對，但是，他們可能連自己都要付出代價。
如果不是銀行call loan，買家想買優質物業都難，但是他們不會阻止代理鋤價，試問邊度有人唔想買得靚、買得平。不過，他們忽略了一件事，即使業主被銀行call loan call到失暈，他們只要賣走手上三成物業，便可以解決問題，而且三成是上限，甚至兩成便可以，當業主達標之後，他們便會惜售，甚至比市價高兩成他們仍然唔會賣，到那時候，物業代理發覺，鋤價鋤得太狠，不但自己搵唔到錢，自己個客又買唔到靚嘢，可能連個客都失埋。所以，鋤價鋤得太狠並非好事，代理職責是促成交易，並不是盲目鋤價。
紀惠集團行政總裁
[湯文亮 茶餐廳手記]