2026-07-24
明報
【明報專訊】星期四早上去到茶餐廳，有客人話唔怪之得經常聽到人講，股市升了之後半年，樓市就會上升，客人在大半年前投資台灣股市，頗有斬獲，現在打算離場，買返幾個物業收租，應該在台灣抑或在香港。
老闆話，咁諗無錯，有很多股票專家經常講樓市有危機，但如果他們在股市賺到錢，第一件事就會去買樓，能夠full paid就最好，否則，如果再有機會再搵錢，立刻還清貸款，當物業是一個錢罌，盡可能都唔會打爛。如果之前唔係有「辣招」，香港人買第二個單位要畀30%特別印花稅，那些在股票市場打滾的專家，每一個都會持有不少物業。
有客人唔信，老闆立即話千祈唔好唔信，較早前出現的輕資產事故，大約有200個連名都唔敢開的人遭受損失，當中大部分都是專業人士，平時炒開股票，賺到錢就買物業，以為輕資產就是物業，所以有咁多人中伏，其實是美麗的誤會。輕資產只是一個模式，一個高槓桿比率的模式，隨時令到參與者泥足深陷，由此可見，有很多在股票市場賺到錢的人都會買物業，對他們來說，炒股是工作，買樓是生活保障。
不過，老闆話，在股市賺到錢買樓不是最聰明做法，但不代表愚蠢，如果無樓梗係要買，但如果有樓，最好將賺到的錢還銀行貸款，將借貸比率降到非常低，以後就會好舒服。
紀惠集團行政總裁
[湯文亮 茶餐廳手記]