【Emily】觀塘聯廈聯管中心開幕 盼為舊廈解難

【明報專訊】舊區「三無」大廈管理問題一直令人頭痛，民政事務總署早前推出「聯廈聯管」試驗計劃，結合同區幾幢大廈一齊聘用管理公司管理。牛頭角區街坊福利會就做咗觀塘區聯廈聯管項目嘅承辦機構，成立觀塘區「聯廈聯管」試驗計劃服務中心推展項目。擔任街坊福利會理事長嘅民建聯立法會前議員顏汶羽噚日話，新營運嘅服務中心6月起至今已接觸咗13幢觀塘舊式大廈，睇吓可唔可以幫吓業主搞好大廈管理。 顏汶羽話觀塘係老區，區內舊式大廈普遍有三大難題，包括財政資源不足、管理公司因利潤微薄無入標誘因、業主缺乏專業知識而唔知點處理政府各項命令。佢話政府推出「聯廈聯管」試驗計劃，做法係集合不同大廈業主，如同「團購服務」。佢話希望透過服務中心能集合政府、專業團體及地區組織力量，一齊為街坊解難。