2026-07-08
明報
【明報專訊】星期二早上去到茶餐廳，有客人話有朋友替人簽擔保，一向都相安無事，但最近買樓，申請按揭時銀行問有沒有替人簽擔保，如果有要立刻取消，否則唔會批出按揭。客人朋友於是要求友人取消擔保，誰不知對方銀行唔放行，現在都唔知點算好。
不想替人做擔保 可搵銀行做「擋箭牌」
老闆問我有沒有替人簽擔保，如果沒有又如何拒絕？我話很簡單，只要回覆話要問過銀行，得到銀行同意才可以簽擔保，否則銀行知道之後有權要求我即時還款，要求我簽私人擔保的人就會立即褪軚，因為他們都知道銀行是不會答應的，我會話想簽但有心無力。
最近有一單輕資產事件，據悉有200人簽了私人擔保，他們不單止替自己簽，仲可能替別人簽，雖然有200人咁多，但傳媒無辦法搵到一個人出嚟接受訪問，講解事件的始末因由。其實，非不為也，實不能也，如果他們接受訪問，即是話畀銀行知，在沒有通知銀行的情况下簽了私人擔保，銀行有可能立即要求他們還款，真係衰多兩錢重，現在他們如啞仔食黃連，苦不堪言都唔敢出聲。除此之外，他們都是專業投資者或者擁有令人敬佩的職業，如果畀人知道替唔相識的人簽私人擔保，面子損失比金錢損失仲大得多。所以，他們是不會出聲，傳媒亦無辦法搵到一個人接受訪問。
紀惠集團行政總裁
[湯文亮 茶餐廳手記]