2026-07-07
明報
【明報專訊】星期一早上去到茶餐廳，有客人話在周末同一個樓市專家食飯，專家話雖然樓價今年以來升了10%，但很快就會下跌，就算7月唔跌，8月都會跌，因為托市的人已經用盡全力，到了強弩之末的時候，客人問那名專家有什麼人托樓市，專家話托市的人托，古龍式答案，很難令人捉摸。
老闆話，現在有能力托樓市的人唔死一身潺，如果只得一兩個物業，就算有錢都無必要托樓市，何必為他人作嫁衣裳。如果認為樓市有潛力而買樓，這是投資而不是托，唔投資唔會死，唔托就會死。
我相信專家所講托樓市的人，一定是物業投資者，專家太睇得起他們，現在大多數物業投資者都自顧不暇，能夠減少啲手上物業已經很好，仲邊度有能力托市，市場上基本只剩下有需要而有能力的人買樓，他們不是托市，而是睇到樓市未來，如果專家知道無人有能力托市，唔知會不會仍然話樓市會大跌。
有人話，如果銀行唔借錢畀人買樓，樓市一定下跌，咁同唔食飯一定會死無乜分別。老實說，銀行已經好耐無借錢畀人買樓，現在批出的按揭並不是借錢畀人買樓，而是根據借錢人的收入而放貸，樓宇只是抵押品，如果無收入證明，銀行是不會借錢畀人買樓。在這種情况下，樓市仍然上升，睇樓市下跌的人一定知道一些不為人知的因素，如果樓市真係下跌，其他人不得不寫個服字。
紀惠集團行政總裁
[湯文亮 茶餐廳手記]