2026-07-03
明報
【明報專訊】星期三早上去到茶餐廳，有客人話今次真係要多謝政府，客人有返咁上下年紀，亦有多少社會地位，參加了不少以體育會為名的富豪俱樂部，每個月要畀成兩萬元會費，唔係一個，而是五六個俱樂部，佢一早打算取消當中幾個，只剩馬會同另一個未揀好的俱樂部，但係唔捨得，如果政府要求補地價，俱樂部一定會將補地價轉嫁到會員，到時候唔捨得都要捨得，但係唔知取消哪些俱樂部。
老闆話，唔使問阿貴，首先一定取消擁有俗稱「番鬼佬碌嘢」（Lawn Bowling）的俱樂部，不過，無端端退出又唔抵，但如果要補地價，早日退出就一了百了，每月慳番唔少。
轉吸內地優才 令俱樂部年輕化
現在有很多老牌富豪體育俱樂部，會員人口老化，消費力不高，雖然唔使蝕本，但主要是靠會費補貼，所以，俱樂部要有活力，一定要年輕化。况且現在有大量內地優才希望可以入會，年輕化是很容易做到的，但點樣可以叫那些年紀老邁的會員離開，政府要求的補地價如果分攤到會員，一定會有一些會員放棄會籍，但是不足夠。
俱樂部應該向放棄會籍的會員發放特惠津貼，假定入會費是100萬元，放棄會籍的特惠津貼是50萬元，似乎是很多，但會所除笨有精，淨袋50萬元，而且，新會員對補地價是不會有意見，如果留番那些老會員，對補地價就會有很大反對聲音。
紀惠集團行政總裁
[湯文亮 茶餐廳手記]