2026-06-24
明報
【明報專訊】星期二早上去到茶餐廳，有客人話上半年本港樓價升了大約7%，今年升15%應該可以做到，但股市下跌，對樓市有無影響，樓市會不會倒插？
老闆叫客人不用擔心，樓市唔係「上門女婿」，唔會倒插，但股市下跌，的確會影響樓市升勢，打算買樓的人與股價相比，覺得股票抵好多，可能會暫時放棄買樓意念。買樓的人減少，樓市升勢一定會有影響，就算升唔到15%，升10%都唔錯，唔好要求咁高。
我仍然維持樓價今年上升15%，但我同意樓市要唞一唞，唔係話樓市會下跌，但在未來兩個月，樓市會出現上落市，兩個月之後埋單計數，樓價可能打和。不過，在這段時間出售的大多數是「摩貨」，或者是一些不甚優質單位，兩個月之後，「摩貨」清理得七七八八，比較普通的單位亦有人買，樓市準備迎接下半年升浪。不過，到時只剩4個月，是否可以升7%至8%，我都唔敢講，但信心仍然是有的。
嚴格來說，樓市唞一唞是好事，不但可以消耗一些「摩貨」及貨尾單位，而且會積聚一批購買力，作為未來升市的動力。如果樓市唔唞，不斷飈升，成交量會愈來愈少，而成交量減少就是樓市下跌先兆，所以，樓市唞一唞是很重要。
紀惠集團行政總裁
[湯文亮 茶餐廳手記]