【Emily】答連任意向 財爺：續做好工作 公帑購宏福業權 畀居民「有得揀」

【明報專訊】今屆政府即將踏入任期最後一年，噚日部分傳媒刊登財政司長陳茂波訪問。被問到連任意向，陳茂波多謝記者關心，又話「對我嚟講，就係畀心機努力，繼續努力做好呢個工作」。對於動用40億元公帑收購宏福苑業權，陳茂波強調係「特殊個案入面嘅特殊性質」，最重要畀居民「有得揀」；至於居民日後嘅居住安排，佢話如果需要增加撥款，政府會向立法會申請。 為咗發展北部都會區等大型基建項目，政府未來每年發債逾千億元，早前亦提高借貸上限。至於政府借貸比率會唔會設上限？陳茂波強調目前借貸比率不足13%，屬低水平，有足夠空間發債，暫無需要為借貸比率設上限。佢又重申政府發債審慎，已獲得IMF（國際貨幣基金組織）等評級機構支持。 率團赴達沃斯論壇 再訪西安 另外，陳茂波噚日率領30人代表團啟程訪問大連，出席由世界經濟論壇舉辦嘅夏季達沃斯論壇，並會晤相關中央部委、遼寧省同大連市領導、各地政商領袖，代表團成員包括引進辦、投資推廣署、港投公司、本港創科園區高層同創科企業負責人。佢之後會轉往西安市拜會當地領導，並去當地大學介紹本港發展，同創科企業代表座談，星期日返港。