2026-06-01
明報
【明報專訊】星期六早上去到茶餐廳，有客人打算買樓自住，佢成日聽到人講location、location、location ，3個location代表唔同要求。究竟買樓自住，邊個location最重要？
我話，第一個location代表地區，第二個代表任何地區內地標式大廈，第三個代表任何大廈高層優質單位，如果用作自住，只能揀一個location，就應該揀第三個，入到屋就是自己天地，地區點靚、大廈點好都唔關自己事。
老闆問，如果是商業，應該揀哪一個location？咁就唔使講，一定揀第一個，在香港應該是中環，所以，近日商業大廈市場回暖，中環的寫字樓空置率立刻下降，租金則回升。其他地區的空置率有可能不但不會下降，甚至回升，原因是該區租用寫字樓的商戶，如果見生意有起色，就會考慮搬去中環，結果令那些地區的空置率不降反升。
所以，任何人打算買樓的時候，都唔好考慮全部3個location，否則的話，選擇是有限，應該只考慮一個，例如買樓自住，就要買高層、坐向好的單位，這區買唔到就買第二區，選擇便多了很多。如果是商業，一定要揀中環、金鐘，否則唔使幾耐，又要再搬寫字樓，如果要晒3個location，可能一世都買唔到樓。
紀惠集團行政總裁
[湯文亮 茶餐廳手記]