2026-03-09
星島日報
在財爺宣讀《財政預算案》之前，我是有些少擔心，因為近日樓市不俗，不但樓價上升，成交量亦增加，仲不時有摸貨出現，摸貨是政府死穴，如果摸貨太多，一定會有一些衛道之士叫政府出招打擊炒家，隨時冚熄勢頭唔錯樓市。
非所有過億物業必須加稅
老實說，冚熄容易，要救返樓市就好艱難，而且，無論是賣地收入或者物業印花稅都是政府收入來源之一，對冧樓市即是同自己荷包作對。
我相信財爺是有壓力，但在權衡輕重之下，財爺選擇向成交價超過一億的豪宅加稅，有物業代理話，打算買豪宅的富豪可能已經收到風聲，所以在過去兩三個月，豪宅市場非常暢旺，但我認為富豪們並沒有內幕消息，但如果打算買豪宅，點解唔早些少，萬一真係加稅，突然間俾多幾百萬真係好唔抵，財爺卒之加印花稅，對超過一億的豪宅加2.25%，由4.25加至6.5%，有很多人問我，加豪宅稅對樓市有冇影響，我話有，不過影響輕微，但政府要澄清一件事。
大約在2009年，政府開始打擊樓市，首先是加印花稅，當宣布時，超過2000萬豪宅印花稅由3.75加至4.25%，講明是豪宅，但後來唔知點解，所有超過2000萬物業，印花稅一律由3.75加至4.25%，今次大家又係講豪宅，希望政府澄清只是豪宅，並不是所有超過一億元的物業都要加印花稅。
湯文亮
紀惠集團副主席及行政總裁