2026-03-05
明報
【明報專訊】星期三早上去到茶餐廳，有客人話今次車牌拍賣，H車牌經過90口價，以2000萬元成交，傳媒話香港人唔使驚，有錢佬仍然喺到。不過，如果車牌以招標出售，價高者得，有無可能去到2000萬元？
老闆話，一定無可能，1000萬元都未必到，由此可見，只要公平公正，拍賣所得價錢是好過招標。不過，要做到公平公正又唔係咁容易，尤其是私人拍賣會，參與者大家都認識，就算大家唔係圍標，但參與者都會有一個排隊心態，今次是你，下次是我，大家唔會將價錢提高。
所以，很多拍賣會，包括一些銀主盤拍賣會，大多數是以底價成交，不是參與者認同拍賣價，只不過是大家都在拍賣場上搵食，大家互搶將拍賣價提高，最終只是益了銀主，所以，底價就是成交價已經是常態。
以往政府賣地都是以拍賣方式進行，但唔知幾時，政府擔心無人拍賣或者被地產商圍標，於是將拍賣改為招標，政府唔知道，這個改動，政府唔見咗幾多錢。不過，政府擔心亦不無道理，當時的地產商資本無現在咁雄厚，對政府推出土地合作發展，既然合作，出價一定唔會高。
不過，現在又唔同，香港地產商經常高踞福布斯富豪榜前列的位置，對合作拍賣買地，基本上是不屑為之，做競爭對手就有可能。所以，香港政府應該改招標為拍賣，唔好讓地產商買到平地，千祈唔好以為地產商買到平地會低價賣樓，我夠膽講，一定唔會，只會以市價賣樓，唔係一定賺，有可能會蝕本。
紀惠集團行政總裁
[湯文亮 茶餐廳手記]