2026-02-24
明報
【明報專訊】星期一早上去到茶餐廳，聽到有客人話昨日去了馬場，見證馬王「嘉應高昇」18連勝，破了香港紀錄，大家都喜氣洋洋，不過馬王總有落敗的一日，相信傳媒唔會有特別報道，但YouTuber唔同，會不會唱馬王落敗呢？
其實，就算馬王落敗，都只是敗一場，甚至兩場，整體而言，馬王仍然是贏多輸少，唔應該被YouTuber唱。
老闆話，真係好難講，在過去兩三年，樓價下跌了三四成，就算是長勝將軍的資深投資者，如果要賣樓，很多時都要輸錢，而且仲輸得幾甘，老實說，做得投資者就預咗輸，輸錢唔緊要，最慘就是被YouTuber唱，連底都起埋，其實，投資者所輸的錢是以往贏返嚟，今日輸返多少，但整體而言，都是贏多過輸，YouTuber點解只講輸，唔講贏。
老闆問，如果我是馬王的馬主，會不會趁馬王破紀錄之後退休，咁就唔會輸，我話唔會，因為咁樣做係對唔住馬王，我會繼續讓馬王出賽，直至連輸兩三場，就會宣布馬王光榮退休。
雖然有很多人話投資者貪勝不知輸，現在要蝕本賣物業，其實，投資者亦知道沒有長勝將軍，但既然一直贏，點解唔繼續贏落去，直至樓價回調，新買的物業要輸錢為止，但投資者發夢都估唔到，輸錢是自己的事，但無端端被YouTuber唱，但無論如何，今次樓市下跌之後，有很多資深投資者就會退休，唔會大注投資物業，細細地玩下就無妨。
紀惠集團行政總裁
[湯文亮 茶餐廳手記]