2026-02-12
明報
【明報專訊】星期三早上去到茶餐廳，有一個做物業投資的客人攞一張菜單畀老闆睇，佢話今晚要請銀行家食飯，餸菜一定要最好，希望銀行家唔會突然call loan，老闆話無意見，叫客人問我。
近一年來，股票黃金都升了唔少，投資的人都賺了不少，如果他們請銀行家食飯，餸菜酒水一定要上乘，但「冠蓋滿京華，斯人獨憔悴」，做物業投資的人不但因為樓價下跌而損失慘重，更因為要準備資金慎防銀行call loan，唔敢投資股票黃金，錯過了賺錢的機會，現在樓市總算露出曙光。
不過，就算可以同銀行家食飯，仍然以酒微菜薄為上策，因為投資者現在所用的錢，可能不是他們自己的，如果投資者「躺平」，所持有的物業價值不夠還債，最後銀行有所損失；今日大魚大肉靚酒，原來是銀行找數，如果酒微菜薄，銀行家都會開心一些。
其實，銀行家如果同物業投資者食飯，代表他的債務已經受到掌控，雖然即時未能達到銀行要求，但仍然是朝着好的方向進發，如果此時候被銀行家覺得投資者太過浪費，並不是太好。雖然，有人不同意我的睇法，他們認為難關渡過，應該好好答謝銀行家，酒微菜薄絕不適合。
老實說，要答謝銀行家，首先唔好「躺平」，繼而做到銀行的要求，如果做到這兩點，銀行家會掉轉頭請客人食飯；不過，仍然是酒微菜薄，銀行是不容許奢侈的宴會。
紀惠集團行政總裁
[湯文亮 茶餐廳手記]