2026-01-15
明報
【明報專訊】星期三早上去到茶餐廳，有做財仔的客人說，財務公司的生意真係唔容易做，就算有物業抵押，都有一定風險，因為現在的客人不會攞優質物業問財仔借錢，如果客人唔還錢，財仔只能沒收那些質素不佳的物業，要大折讓才可以賣得出，已經有不少財仔中伏，搞到自己要執笠。客人講得無錯，財務公司在高峰時2000多家，減至現在不足2000，最後客人話，都係做收租佬好過做財仔。
老闆話「錯、錯、錯」，一定是做財仔好過做收租佬，首先講回報，收租只得3厘至4厘回報，而財仔做有抵押的貸款，最低限度都有10厘回報，單計回報來說，財仔已經好過收租佬唔知幾多倍。
財仔的貸款是有抵押，如果無抵押利息會非常高，貸款金額亦不會太大，所以，不能與收租作比較；而有抵押的貸款，如果債仔唔還錢，財仔可以將抵押物業沒收，跟着可以公開拍賣，如果樓價不是大跌，財仔是沒有風險。
但做收租佬唔同，如果租客唔交租，雖然可以封租收樓，但欠租很難收到，無論樓市升跌，收租佬都會出現損失。以損失程度來說，欠租的損失是大過欠債，除非樓價大跌，否則，收租佬的損失一定大過財仔。
如果欠財仔的人唔還錢，財仔追數是天經地義；如果租客欠租，業主追租就會被人話無良。在人情冷暖來說，做財仔仍然好過做收租佬，所以，真係唔明白點解咁多人鍾意買樓收租。
紀惠集團行政總裁
[湯文亮 茶餐廳手記]