2026-01-14
明報
【明報專訊】星期二早上去到茶餐廳，有客人話有一個物業出售，一兩個月前無人問津，但近日唔知點解，買家非常勇猛，一個比一個出更高價，是不是叫做「瘦田無人耕，耕開有人爭」？
老闆話，又不可以一概而論，打算買樓的人知道那一幅不是瘦田，但是他們擔心，如果買入之後樓價繼續下跌，他們立刻「坐艇」。所以，他們出價一般都低於市價10%以上，就算樓價下跌，都有10%水位做緩衝，但在這個情况，除非業主是等錢使，或者被銀行迫倉，否則都很難買到。那些買家以為買唔到都沒有損失，其實是有的，他們損失了一個機會，以後要買相似物業就要多付很多錢。
現在的買家點解會追價，並不是「瘦田無人耕，耕開有人爭」，而是那些買家認為，即使買貴咗，都只是買貴一口價，就好似拍賣一樣，一口一口價加上去，最後拍到的人不認為自己買貴咗，如果他唔買，爭一口價的買家就會買到，無理由兩個人，甚至三個人都做錯決定，所以他們非常心安理得。
其實，當一堆人爭一個物業時，物業價格是會被一口一口價推高，在這時候，買家更加要提高警覺，如果遠離市場價格或者自己負擔能力，就要考慮放棄，唔好以為最多只是買貴一口價，而是一口一口加上去，最後買貴很多口價。
紀惠集團行政總裁
[湯文亮 茶餐廳手記]