2026-01-12
星島日報
樓市去年出現先跌後升情況，差估署公布最新樓價指數，全年樓價升幅擴大至近3%，而新盤銷售成績亦相當理想，全年售出單位超過2萬伙，創出新盤一手銷售條例後新高水平，有對樓市非常有研究的老友態度轉變，並認為今年樓市應該會「翻生」。
今年樓市應「翻生」
影響樓市的各項因素變得有利，政府推出利好樓市措施，美聯儲局亦於去年年尾減息，雖然本港沒有跟隨，但預期今年息口仍有機會進一步減息，若美國繼續減息，相信到時本港銀行唔減都唔得。
利好消息持續影響之下，就連一向唱淡，話樓市好似一個深淵的大淡友，亦都一改對今年樓市的睇法，看好今年樓市發展，認為今年全年樓價會有約5%的升幅。
雖然升幅不算高，只屬輕微，但大淡友改變對樓市睇法的舉動，便更值得大家關心及重視。
影響樓市因素變得有利
老實說，現時各項影響樓市的因素的而且確變得有利，但大淡友唱好可能並非那些因素，然而，大淡友唱淡樓市的目的，就是希望銀行call loan，實力不夠的業主便會被逼出售物業，目的顯然而見，是可以多做更多的生意，而事實上，大淡友的目的亦已經達到。
不過，又未能看到大淡友可以多做更多的生意，主要原因是打算賣樓的業主，如果委託一個經常睇淡樓市的代理去出售自己物業，又點會賣得好，若沒有業主委託大淡友出售物業，又何來會有多生意做的道理。
話分兩頭說，大家亦不用替大淡友擔心，那些比大淡友睇樓市睇得更淡，或者盲目咁向業主「鋤價」的買家，就會搵大淡友代表他們出價，業主當然不會接受，最後未能出售單位，到頭來依然得番個「桔」，未能做得成生意，想唔睇好樓市都唔得。
樓價止跌回升極之正常
雖然有人說大淡友看好樓市是被逼的，但亦不能夠一概而論，在人口增加，對住宅單位的需求相應增加，在供應不足的情況下，而香港經濟亦回復增長的情況之下，樓價止跌回升是極之正常的情況。
如果在這個情況仍然唱淡樓市，亦只不過是「包拗頸」的做法。但如果今年樓市最終有雙位數字的升幅，大淡友的損失就會很大，不但做唔到生意，而且還有損自己的專業尊嚴。現在睇好樓市發展就是轉軚的最佳時機，同時亦叫那些打算「鋤價」買家可以「死了條心」。
湯文亮
紀惠集團副主席及行政總裁