2025-12-19
明報
【明報專訊】星期四早上去到茶餐廳，聽到有客人話利息咁高，而自己住的地方又咁大，雖然已經Full Paid，但仍然覺得好浪費。老闆話唔係浪費，而是奢侈，客人的子女已經出身，只是他兩夫婦與一個菲傭住一個2000方呎，市值大約4000萬元的單位，住咁大間屋等於每日請客食大餐，不如轉換一間約千呎，市價約2000萬元的住宅，換屋之後，有一大筆錢可以投資或者消費，對香港也是好事。因為住細咗就有錢消費，住得大，能夠消費的錢就變了利息而揮發了，客人話極有道理。
老闆講得無錯，如果年紀大了又不是與子女一齊住，最好換一間比較細的住宅，以前我提出過「3間樓投資法」，後來因為政府出「辣招」而變成不可行。
「3間樓投資法」大意是一個在接近退休的人最好有大中小3個單位，如果與子女一齊住而又人多的話，梗係要住大單位；如果只得兩夫婦及一名子女，咁就要住中型單位；如果只得兩公婆或者一個人，就一定要住細單位，咁樣才可以物盡其用。兩夫婦住細單位時，他們會發覺其他兩個單位的租金，會令他們消費得非常充裕。所以，當一個人年紀大了，應該住細啲，留返啲錢消費，有助香港經濟。
很多人都明白這個道理，但過唔到自己個關，因為大屋搬細屋，一定會惹來很多閒言聞語，我自己亦嘗試過，但不用理那些閒言閒語，只要諗住細咗，有多啲錢消費，可以推動香港經濟，就會開心很多。
紀惠集團行政總裁
[湯文亮 茶餐廳手記]