2025-08-03
oriental
美國日前公布對全球貿易夥伴的新對等關稅，周四起生效。所謂「對等關稅」，根本就係飛擒大咬，關稅稅率由10%至41%不等，但附件清單不包括中國。這便是老朽所說的，美國對中國正是喃嘸佬跌落屎坑，冇晒符！
特朗普喺對等關稅暫緩期限8月1日到期前，簽署新行政命令，對92個貿易夥伴徵收10%至41%關稅，部分貿易夥伴的稅率較4月公布時有所增加。從「解放日」開始，侵侵無非先以開天索價的方式，以超高關稅迫使其他國家或地區，與美國進行一對一貿易談判，繞過世貿組織等國際貿易機構規定；再於談判桌上作出讓步，即給予低於先前獅子開大口的關稅水平，通常係10%，不過，代價就係要對方額外承諾巨額投資、貨物採購和天文數字的能源買入，從而達成所謂「貿易協議」，呢，日本、南韓、歐盟等就係咁簽下「城下之盟」！
當然，呢啲所謂「貿易協議」，根本就不切實際，好似歐盟咁吖，喺協議中承諾3年內購買價值7,500億美元嘅美國能源產品。阿哥，呢個金額幾乎等於歐盟全年總進口量，以及美國每年出口總量嘅80%。換句話說，即係不論歐盟或美國本身，都沒有本錢去實現呢個協議，你話係唔係浮誇到有如烏龜忽然識飛吖！
中國於談判前夕，已經表明談判要互相尊重、互利共贏，有原則和底線。中國的腰桿愈來愈硬，硬在無懼美國如何圍堵、制裁，中國都能殺出一條路。而且，侵侵再狂再傲慢也得承認，沒有中國，好多嘢都玩唔起，美國根本就係魚離不開水，中國是水，冇魚反而更清，故侵侵亦深知同中國硬碰，只會贏得兩粒字：苦也！中國沒有像其他國家任由侵侵魚肉，靠的是自身硬，鬥出來的！