2025-11-21
明報
【明報專訊】星期四早上去到茶餐廳，聽到有客人話，他的女兒已經30幾歲，雖然有男士追求，但不合女兒要求，現在摽梅已過，但仍然嫁唔出，雖然降低要求，但合資格的男士愈來愈少，就算搵一個二婚的都唔係咁容易。反觀女兒的朋友，樣貌與學歷都比不上他的女兒，但大部分早已成家，子女已經入讀小學，係諗極都唔明。
老闆話，唔使問阿貴，客人的女兒一定非常漂亮，一般男仔唔敢追，而女兒本身的眼角亦非常高，對一般條件的男士根本睇唔上眼，見到其他條件比自己差的女仔都可以搵到優質男士，對擇偶的要求就更加高。如此這般蹉跎歲月，很容易到摽梅之年，當年紀大了要搵到合適的就更加困難，唯有大幅降低標準，才有機會嫁出去。
有做物業投資的老友同我講，今年被銀行追數追到失魂，其實，當日有機會可以賣走，但見到一些低層、方向無咁好的單位都可以賣到高價，無理由自己的物業賣得差過他們，所以，拒絕了不少offer，如果當日寧願平些少都將那些單位賣走，今日就唔使咁頭痕。
這是物業投資市場一個現象，不少投資者見到同座大廈的中層單位都可以賣到好價，自己的高層單位非高價不賣，反之一些低層單位業主，見有人出價就急不及待賣走，而且價錢都唔錯。到了現在，銀行追數，擁有優質單位的業主唯有大幅降維，甚至要接受恥辱性的出價，摽梅已過的靚女會明白。
紀惠集團行政總裁
[湯文亮 茶餐廳手記]