2025-10-27
明報
【明報專訊】星期日早上去到茶餐廳，有客人話，有一個一向睇淡樓市，經常叫佢賣樓的物業代理，最近對樓市的態度有所改變，雖然仍然睇淡樓市，但只是略淡，唔係好似以往咁，認為樓價仍然有大幅下調空間，仲話如果沒有迫切需要，手上的優質物業並不需要出售；如果成交量持續，而樓價又可以保持，樓市有機會止跌回升，甚至出現轉角市。
老闆話，物業代理都是為勢所迫，現在賣樓的人都是因為自己有迫切需要，或者是身不由己，任由銀主賣樓，否則就算代理點唱他們都不會賣樓，反而嚇窒那些打算買樓的人，令到物業代理收入減少。既然如此，倒不如停止唱淡，但亦唔敢唱好，否則，就會畀人話，上半年仍然唱淡，現在唱好，真的是很難自圓其說。
代理續唱淡 令收入減少
老闆可能唔知道，物業代理唔敢唱淡，就是他們知道一件事，就是打算買樓的人多過賣樓的人唔知幾多倍，如果他們繼續唱淡，即是「逆天而行」，而且令自己收入減少。現在唔唱淡，到明年就可以大膽唱好樓市，屆時樓市的確有機會出現轉角，如果配合美國減息，香港消費力釋放，樓價想唔升都難。
其實仲有一個關鍵因素，就是發展商已經放緩建樓速度，當樓宇需求量增加，供應量就跟唔上，樓價當然會飈升，物業代理當然知道，現在叫熟客賣樓，除非同佢有仇。
紀惠集團行政總裁
[湯文亮 茶餐廳手記]
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意。）