2025-09-15
星島日報
有老友話睇到統計數字，財務公司的數字由七年前的2490間，下跌到最近接近約2000間，足足少了444間，理論上現在做財仔都好穩陣，不少財仔根本唔做私人貸款，而集中做物業按揭，銀行借四成，財仔借七成，就算樓價下跌都唔會輸入肉，況且仲收咗一段時間高息，唔使搞到要執笠，甚至要走路。
好多財仔今次啞子食黃蓮，知道自己俾銀行冼了一鑊但又唔出得聲，雖然話財仔做按揭只借七成，但大多數都是根據銀行的估價報告來做，銀行只借四成，絕對唔介意測量師估高兩成，即使如此，仍然未借夠一半，只是四成八。
大多數根據估價做按揭
但財仔情況就唔同，若測量師估高兩成，借七成就會變咗借八成四，現在樓價比高峰時最少下跌三成，不少問財仔借按揭的客戶早已資不抵債，而財仔又將那些按揭物業打包問銀行借錢，如果那些客戶選擇躺平，財仔不但輸入肉，仲要抬錢向銀行贖身。
財仔這時才知道用銀行估價報告是一個陷阱，唯有自嘆這陷阱偏財仔遇上。
湯文亮
紀惠集團副主席及行政總裁