2025-09-10
明報
【明報專訊】星期二打完風，大家正常返工，不少客人在返工之前先去茶餐廳飲杯咖啡。有客人話近日非常激氣，有代理叫佢賣走一個物業，不過時勢唔好，客人要畀高佣金，客人認為「羊毛出自羊身上」，價錢做得好，高佣金都無問題，但最後代理攞一個低市價兩成的offer畀佢，仲話這是最後逃生門，不過，價低還價低，一樣要畀高佣金。
老闆話，現在代理行業有多少反常，一般來說，如果代理主動叫業主賣樓，一定唔會收足佣金，否則很難打動業主。反過來說，如果業主想賣得好價錢，就會同代理講，如果做得好價，就畀多啲佣金，不少高價成交都是高佣金促成，甚至出現代理回部分佣金畀買家，所以才有咁多不合理高價成交。現在就唔同，代理在開始時就已經要求業主付高佣金，但不是替業主做好樓價，而是繼續鋤價，所以，現在賣樓的業主非常頂住條氣，又要畀高佣金，又要畀代理鋤價。
如果成交價是真正市價都無辦法，但現在是代理鋤價之後成交，新買家很快就會將物業「摩走」，賺幾十個八個巴仙都無問題，但現在有個案業主在賣走之後，不足一個月，在未正式成交之前已經「摩走」，賺錢幅度接近五成。這個個案令到不少賣樓的業主對代理有戒心，容乜易在賣走之後被新買家「摩走」，打工的更加要提高警覺，否則，別人賺錢自己孭鑊。
紀惠集團行政總裁
[湯文亮 茶餐廳手記]