2025-07-31
明報
【明報專訊】星期三早上去到茶餐廳，有客人話打算以獨家代理賣走一個物業，市場上有咁多測量師及代理行，究竟搵邊家最好？有人同佢講，搵獨家代理要好小心，有乜依郁，獨家代理就會變成「獨家害你」。
老闆話，如果物業很貴重，客人又願意付足夠佣金，不妨邀請出名測量師以及代理行，叫他們評估可以賣到幾多錢，邊個話賣得最高就畀邊個做，這是獨家代理的物質不變定律。
有客人話老闆此言差矣，今次獨家代理的物質不變定律可能要修改，最近搞到香港樓市沸沸揚揚的麥當勞，用獨家代理的方法賣舖，不但沒有將代理權交畀睇好香港樓市的測量師行或者代理行，而是交畀一個睇香港樓市睇得最淡，甚至話香港樓市有一個無底黑洞的測量師行。所以，什麼物質不變定律都是廢的，業主鍾意畀邊個做獨家代理都可以，唔使一定要畀估價最高的代理。
客人可能唔明白，今次負責麥當勞賣舖的獨家代理是一家外資測量師行，睇淡香港樓市的是香港負責人，而向麥當勞總公司爭取獨家代理的應該是總公司的人，對麥當勞舖位估價應該是高於其他測量師行或者代理行，否則，麥當勞總公司絕對唔會畀一個睇淡香港樓市的測量師賣舖。
當那家測量師行的同事向有心人兜售麥當勞舖位時，會不會話香港樓市是一個黑洞，不但唔會，反而會開始唱好樓市，連最睇淡的測量師都唱好，唔使講大家都知道樓市以後走勢。
紀惠集團行政總裁
[湯文亮 茶餐廳手記]