2025-06-25
明報
【明報專訊】星期二早上去到茶餐廳，有客人話他的兒子處於叛逆期，總係唔聽佢講，有乜辦法收拾他的兒子？客人老婆話經濟封鎖是最好辦法，不過，客人擔心以前行得通，現在未必行得通。
老闆話未試過又點知行唔通，而事實上經濟封鎖幾時都行得通，就算搞冧一個地方，經濟封鎖仍然是最好辦法。香港現在經濟很差，消費不理想，有很多舖頭執笠，主要原因不是一般人所講市民北上消費，或者沒有夜繽紛，而是香港經濟被封鎖，市民無錢又如何消費，北上尋找一些較便宜消費亦是迫不得已。
封鎖經濟 無人消費
很多人唔明白香港如何被經濟封鎖，大家都睇下「財爺」的訪問就知道，「財爺」呼籲銀行在有息還的情况下，唔好向發展商call loan call得咁緊要。
老實說，銀行並不是今日才call loan，不過以往的受害者是物業投資者，得唔到市民支持，政府一於少理，現在燒到發展商，影響香港經濟，政府才不得不作出呼籲，估計銀行亦一於少理，陳茂波都是得個講字。
樓價下跌雖然是有很多個原因，但銀行call loan「獨佔鰲頭」，銀行因估價下跌而call loan，業主不得不賣樓，不知幾多業主在不必要情况下賣樓，樓價又點會唔跌，不少業主不但資產價值減少，甚至變成負資產者，又如何有能力消費。
小學生都知，經濟動力來自消費，無人消費，香港有乜辦法唔死，至於點解無人消費，睇返上文就知道。
紀惠集團行政總裁
[湯文亮 茶餐廳手記]