【明報專訊】星期三早上去到茶餐廳，有客人話在年初時地產商接受傳媒訪問，都會話今年推出幾多個單位發售，但只聞樓梯響，今年過了接近三分之一，只是賣了兩三千個單位，當中大部分是貨尾單位，長期樓花是絕無僅有。盼星星盼月亮，望到有地產商以低於市價，甚至低於成本價推出新樓樓花，樓市才有機會反彈，否則，就算樓價唔跌，都只是一個悶局。
老闆話，樓市高高低低是一個循環，如果地產商在樓價最高的時候開盤賣樓花，就算可以賣個滿堂紅，但就會面對樓市回落，買家撻訂，一個本來已售罄的樓盤，到入伙時空置率非常高，地產商在樓市不景時要重售那些單位是很困難，最後樓盤的利潤會大幅下降，不但有可能蝕本，甚至變成爛尾樓。雖然在香港不會發生，但在內地，這個情况就時有所聞，所以，在樓市暢旺時賣樓花有可能面對大量撻訂的情况。
反之如果地產商在樓市低迷時以低價促銷，就可以確保買家不會撻訂，如果賣得好可以加價繼續賣，令到當初用低價買樓的人非常開心，他們甚至可以加價賣走當日買入的單位，無形中替樓盤的樓價築底，樓市反而有機會反彈，到新樓盤入伙時唔會出現地產商最擔心的烏燈黑火情况。所以，在樓市低迷時開盤並非下策，不過，一般地產商都不屑為之，他們寧願賣貨尾單位，待樓市反彈才開新盤賣樓，如果地產商唔替新樓盤築底，樓價又點會反彈。
紀惠集團行政總裁
[湯文亮 茶餐廳手記]