2025-02-03
星島日報
上周本欄《買樓自住此其時》一文，不少老友睇完表示不同意，因認為樓價仍有排跌，冇理由現在入市。
小弟有咩反應？Yes！的確樓市係會再跌，單單睇發展商急如熱鍋上的螞蟻，各出奇招散貨就知。散貨，誠哥最犀利，大家可記得佢當年點劈價，一野就散咗盈翠半島幾千個單位？
發展商搏命出招散貨
另外，長實收購廣東道警察宿舍改建成豪宅港景峰，不幸落成後撞上地產大低潮加沙士，佢就出到「買樓送車」的奇招。
20多年後的今天，弊，發展商又要再搏命出招散貨，包括樓價借凸（咪以為唔使還）、買樓送樓（買大單位可抽獎有機會中多個細單位）、保證租務回報（等你以為一買即有人替你供樓），以及買樓送車位（其實荷包兜肚）。
以上四招O氹咗你上艇入咗籠先，之後點真係關人個關嘞。由此可知，新樓銷售情況幾咁水深火熱。所以如今入市投資有絕大風險，自己要考慮清楚！
但自住則完全唔同，再強調一次，優質單位就如賢妻，可遇不可求，若遇上就快手據為己有，因呢類單位絕對罕有，不能以市價去計。你畀多1至2成價錢，可獲終身安寧與幸福，這就是超級無形價值，明白嗎？
這類單位，業主只有兩種情況肯放，一是炒燶物業，被銀行call loan call到吊頸，雖則手上有N個單位，但此時此刻質素差的，哪會有人問津？唯有被逼割愛，放出市場必有承接的靚貨。
靚盤割價可一不可再
另一種情況是移民又或非走不可，前者大家都知點解，後者多屬早年內地來港的大款大腕，當時大把錢可以亂掃，如今或許唔走佬唔掂，故才以跳樓價放出昔日天價購入的單位，這情況絕對可一不可再。
以上兩類單位，不會是樓花，也不會是新盤，故此你可驗清驗楚，是否喜歡才出價。
我居所附近有幾個豪宅盤，全部屬現貨，講都唔信，已劈咗三分一價，仍未能出售。這種買家變天之驕女情況絕對難逢。自住？快去馬！
資深傳媒人 曾智華