2025-01-20
星島日報
有年輕朋友打算將已經住了10年的單位賣走，理由是在高息環境下供樓比較辛苦，賣走之後租樓住，所得到現金可以做定存幫補租樓，由於不需要供樓，生活就比較輕鬆，年輕朋友問我意見。
有心理準備永遠買唔返樓
我話沒有意見，如果有需要，例如要移民，或者長期供唔起樓，就必須要賣樓，否則，就要回想當日買樓的時候是幾咁辛苦，當時唔係有朋友借錢，父母簽擔保，根本買唔到樓。
今日賣樓的確可以改善生活質素，但以後要再買樓就唔係咁容易，就算睇啱個市，樓價下跌，父母已經冇能力簽擔保，朋友亦不會借錢俾佢買樓，有可能要一直租樓住，很難再買樓。
唔好只睇眼前利益
年輕朋友可能唔知道，10年前一般人的手頭現金都比較鬆動，朋友有需要或者都會幫手，現在即使有心都無力。
同樣情況，10年前不但利息低，而且銀行有大量資金，按揭貸款比較容易，但今日就唔同，不少人落了訂都做唔到按揭，如果那些人是在10年前申請就冇問題。
今日賣了樓的人要有心理準備永遠都買唔返，所以，打算賣樓的人唔好睇眼前利益，或者預測樓價繼續下跌。
而是回想當日買樓是幾咁困難，離了婚再結婚的人百分比不高，但仍然高於賣了樓可以再買返樓。
湯文亮紀惠集團副主席及行政總裁