2024-12-31
明報
【明報專訊】有老友問明年樓市升或跌，現在是否買樓的時機，有不少投資者出貨，可不可以等多一陣。我話樓市已經連跌3年，物極必反，明年應該有大約5％至10％升幅，如果不是有咁多投資者被迫賣樓，升幅會更大。
老友稍為唔同意，他認為可以等多一陣，因為投資者並不是攞一兩個物業出嚟賣，而是攞十幾個，可以等他們賣了幾個之後才買，因為會愈賣愈平，現在買樓他日會好後悔。
投資者符銀行要求後 不會輕易賣樓
老友想法與大多數人一樣，以為投資者攞十幾個物業出嚟一定要賣晒，其實，今次投資者要賣樓，大多數是因為銀行要求降低借貸比率，就算攞十幾個物業出嚟賣，但只要賣走其中幾個，就已經可以符合銀行要求，就算繼續賣，價錢一定會提高。但以我的經驗來說，當投資者借貸比率符合銀行要求，就唔會繼續賣樓，所以，現在買樓，要本着睇啱就買心態，千祈唔好等，否則「蘇州過後無艇搭」。
老友叫我試舉例以說明之，我話某一名投資者持有10個千萬元物業，每個借了600萬元，總借貸比率六成，銀行要求將借貸比率降至五成，那名投資者毋須將所有物業出售，否則借貸比率不但降至零，而且仲持有4000萬元現金，變成過猶不及。投資者只要賣走其中兩個物業，將所得資金降低銀行貸款至4000萬元，而物業總值亦降至8000萬元，剛好是五成，當符合銀行要求之後，投資者就唔會咁輕易賣樓。所以，有能力但睇啱唔買，日後可能會好後悔。
紀惠集團行政總裁
[湯文亮 敢說反話]