2024-12-23
星島日報
上周本欄提及，小弟見到住所附近車位嚴重不足，剛行過一間花店門口貼着「豪華住宅車位——115萬出售」，突然心思思想買。結果回家問「投資達人」肥妹老婆，佢一錘定音話「唔好買」！哦哦哦，唔買咪唔買囉。
理財專家肥B睇到，立即約我出來晚飯，權威地分析：「碌Sir，你老婆大人啱㗎。買樓或買車位收租通常要先視乎3個情況，再冷靜下決定。第一，樓市是否正在上升；第二，樓市是否在打橫行；第三，樓市是否正在下跌而未見底。」
肥B指出，買樓買車位，應該只在第一種情況下出手，因會有機會賺樓價再賺租，這情況在2004年開始到2015年皆如是。
車位雜費多回報低
若面對第二種情況就要縮手，因買樓買車位，未見官先打八十大板。即樓價外，更要俾律師費、釐印費、經紀佣金，再加上基本裝修。買入後，個個月再畀管理費及各種或公或私維修費，另外每季必須交差餉，一闊三大。結果左減右減之後，回報率2.5厘都冇。所以若樓市打橫行，這項投資絕對冇價值，遑論要「服侍租客」，分分鐘煩到人都癲，賠了夫人又折兵！
好嘞，若遇上第3種情況，更切勿買物業博收租，因整個市正在下行，冇人知會跌幾長時間及跌幾多才停。百幾萬買個車位看似好穩陣兼唔憂冇人租，但若車位價值跌到100萬以下，再加埋上述提及的種種費用，你就會蝕得好傷，變成流血不止。
肥B問小弟：「碌Sir，你覺得目前物業市場，是第一、第二或是第三種狀況呢？」
樓市未止跌不宜入市
呢條問題真係刺激我思考，事實上，如今無論新盤及半新盤皆蟹貨處處，這個實況，小弟朝朝行經附近大小地產代理公司，睇吓櫥窗已完全了解，唔使人教。意即物業市場下跌空間仍不會細，這已證實老婆大人啱晒。
肥B繼續講：「碌Sir，如今撳地游水投資，為買基建債券，享受活期操作定期利率，更加保底3.5厘，邊度搵？最正係當你見到其他更筍機會，可以立即套現換馬，基本上有贏冇輸。所以若基建債跌破底價，應多多都掃。」
資深傳媒人 曾智華