2024-12-23
星島日報
有內地老友打算買新樓，但在報紙見唔到新樓盤廣告，想自己去了解都唔得，一定要靠代理介紹。老友亦知道「代理靠得住，豬乸會上樹！」的道理，但唔明白地產商用咁多個億起樓，到賣樓的時候只是靠代理推銷，似乎十分倒退。
訪問內容千篇一律
老實說，地產商真係要在報紙落廣告，除了有推廣作用之外，亦希望報紙收到廣告費之後，替新樓盤講幾句好說話。
雖然現在有很多新樓盤在推出時，地產公司都會派同事接受傳媒訪問，內容差不多是千篇一律，不是講樓盤資料，而是講世界形勢。
香港樓市走勢，一定會話在世界形勢大好之下，香港樓價會上升一成，老實說，根本冇人睇，對新樓盤不但沒有正面幫助，甚至激嬲傳媒，關於樓市報道，只會報憂不報喜。
應在報紙落廣告
近日大家睇報紙，見到關於樓市報道，大多是劈價蝕讓等成交，要很留心才可以搵到一些摸貨賺錢成交，地產商當然不滿意，但又難怪報紙咁講，少少廣告都唔肯落，冇理由仲同樓市講好說話。
地產商要解決這個困局亦不是很艱難，只要在每次推出新樓盤時，都會向報紙落廣告，報紙收到廣告費，就算唔唱好都唔會唱衰樓市。
湯文亮紀惠集團副主席及行政總裁