2024-12-16
明報
【明報專訊】有老友話，唔經唔覺已經到了年尾，往年在這個時候，樓市專家、測量師、玄學家都走出嚟預測樓市，非常熱鬧，有人講升兩三年，現在唔買樓就無機會；亦有人話跌兩三成，現在是樓市逃生門，今日唔賣以後很難有機會賣。
但今年非常平靜，不但公開預測樓市的人不多，就算作出預測的人，無論預測升跌，幅度都很小，上落5%之間，就算大摩有咁多研究員，對香港樓市預測是上半年跌5%，全年打和，不如講樓市平穩仲好，大摩評論員知道唔講得，因為樓市平穩就是飈升信號。
一場足球比賽，如果某一隊一定不會失波，觀眾以為那隊波唔係贏波就係打和，其實是錯誤的，教練知道自己隊波唔會失波，就唔需要打防守，在全攻型之下，唔係贏波咁簡單，而係大勝。如果打算買樓的人知道封了蝕本門，自然夠膽買樓，最後做成樓市飈升都唔出奇。不過，樓市仍然有多少隱憂，所以，評論員預測明年樓市都會比較保守，最進取的評論員都唔敢話樓市大升。
「撤辣」或引入專才 料明年效果較好
今年樓市應該最少有10%升幅，但最後埋單計數，可能下跌5%。很多人不明白，政府已經全面「撤辣」，又以專才、優才、學生等引入大量內地人來港，但點解樓市仍然下跌。其實，無論「撤辣」或者引入國內人來港，效果都要等一段時間才顯露出來，相信明年會發揮得比較好。
今年樓市下跌最大原因就是銀行收緊按揭，不少持有多個物業的業主措手不及，莫講話買樓，甚至要賣走手上部分物業以符合銀行要求，賣家多，買家少，樓價點會唔跌。如果銀行明年不再進一步收緊按揭，樓市是不會下跌，萬一銀行稍為放寬按揭，樓價就會掉頭上升，一般評論員都唔知道銀行對樓市取態，所以唔敢講大升大跌，5%上落是最穩陣預測。
紀惠集團行政總裁
（本網發表的文章若提出批評，旨在指出相關制度、政策或措施存在錯誤或缺點，目的是促使矯正或消除這些錯誤或缺點，循合法途徑予以改善，絕無意圖煽動他人對政府或其他社群產生憎恨、不滿或敵意。）
[湯文亮 敢說反話]