湯文亮：春宵一刻值千金

【明報專訊】有老友話，隔籬單位業主問老友買唔買佢個單位，價錢大約是市價，老友身邊不少朋友話樓市仲有得跌，叫佢等多一陣，可能會執到「死雞」。老友覺得唔係幾妥，因為老友曾經出價高過當時市價兩成買那個單位，但業主拒絕，如果以現在業主所要的價錢，實在大幅折讓三成，老友想買，所以問一問我的意見。 「千金難買相連地」 我現在最開心就是聽到有人買樓，不但唔會話等多陣，可能有「死雞」執，而且會叫打算買樓的人有咁快得咁快買，因為現在賣樓的業主大多數是因為財務問題而迫於無奈，當那些業主解決了問題，就唔係咁輕易賣樓，至於老友更加要買，理由很簡單，一句「千金難買相連地」便可以。 老友話，雖然是「千金難買相連地」，但現在業主願意以市價賣畀佢又點可以講「千金難買相連地」。老友唔明白千金除了代表金錢之外，亦代表時間，有所謂「春宵一刻值千金」，如果業主不是自己有困難，或者被銀行call loan call到失魂，一定唔會賣，但業主願意賣樓的時間是很短暫的，因為業主的財務困難並不是永恒，當搞掂那些問題，或者賣走另外一些物業，老友加價業主都未必肯賣，現在趁業主有需要賣樓，不但可以幫到人，又可以買到自己的心頭好。老實講，唔係咁容易買到相連地，除了價錢之外，時間亦非常重要，正是「春宵一刻值千金」。 紀惠集團行政總裁 [湯文亮 敢說反話]