2024-11-27
明報
【明報專訊】近日市場上有好多物業以低價開拍，雖然傳媒無講最後結果，但估計價錢亦不會太好，因為業主賣樓，無可能用拍賣方法，尤其是那些幾百萬元一個單位的物業，拍賣者一定是銀主，銀主賣樓有一個特色，就是要錢唔要貨，甚至以開拍價成交他們亦可以接受。所以，低價成交雖然不斷出現，不過並不反映市場價格，但銀主盤低價成交太多，難免影響物業市價。
有網民話我睇樓市唔準，8年前寫細價樓爆煲論，到今日才爆煲。其實，當時我寫細價樓爆煲論只是想提醒大家，千祈唔好問「財仔」借錢買樓，因為當樓價下跌，「財仔」會立刻要求債仔還錢，否則就會立即沒收物業。以銀主盤在市場拍賣，並且很少話未到價收回不賣，因為「財仔」仍然可以向債仔追討尾數，當時我將事實寫出嚟，畀人笑到面黃，不少向「財仔」借錢買樓的人話我食不到的葡萄是酸的，我唯有寫少兩篇，無謂阻人發達，但唔寫又唔得，否則在爆煲之後，那些受害者又會怪責我們做分析員的沒有提出警告，寫又畀人鬧，真係好人難做。
有經驗的業主知道銀主要錢唔要貨，所以在變成銀主盤之前，那些業主就會自己放在市場出售，價錢一定會比拍賣好得多，而且無咁肉酸，因為在市場拍賣，大家都知道業主財困，可能會引致不必要的麻煩，甚至令到其他債主追數。
有人曾經問我，他非常等錢用，可不可以將一兩個物業按畀「財仔」，攞一筆資金應急。既然是等錢用，當然可以，但千祈唔好將優質物業按畀「財仔」，否則，萬一還唔到錢，「財仔」便會立刻沒收物業，經過拍賣流程，將優質物業合法出售，是否有利益衝突我唔敢講，不過，君子需防人不仁，自己要小心一些。
紀惠集團行政總裁
[湯文亮 敢說反話]