2024-11-19
明報
【明報專訊】中外傳媒對香港只會講衰，唔會講好，但外媒比較好，即使講衰，但在某個情况下將真相講出嚟，不過就要考下大家理解能力，唔似得香港傳媒，日日夜夜講樓市下跌，但又無解釋點解有咁多劈價蝕讓，而中原指數不跌反升，在過去一個月上升了1.83％，升勢似乎會持續，到了年底，指數可能冇乜升跌。至於明年，大部分分析員都會話樓市平穩發展，指數在窄幅上落。
最近彭博分析員講香港樓市，話空置率下降至4%以下，明年租金及樓價升逾5%，老實說，空置率與失業率都是一樣不會清零，4%已經好低，彭博分析員雖然話低過4%，但仍然沒有說出真相，因為可能是3%、2%，如果空置率只得2%，甚至好似彭博分析員所講空置率4%以下，樓價想唔升都難。
全世界無論業主都知道，租金與樓價是掛鈎，租金上升，業主願意多付樓價買樓收租，而租客見到自己替人供樓，倒不如買樓自住，唔使替人供樓。至於現在打算賣樓的業主，見到租金上升，空置率又低，都唔捨得賣樓，就算要賣都唔會劈價蝕讓咁慘，而彭博分析員話空置率低於4%，租金及樓價上升逾5%。
空置率不會清零
無論樓市走勢如何，都會有一些劈價蝕讓出現，如果按照報紙報道，數目的確不少，但要反過來看，有咁多業主劈價，中原指數仍然上升，代表有不少人賺了錢，不過，傳媒沒有留意而已。
紀惠集團行政總裁
[湯文亮 敢說反話]