2024-11-05
明報
【明報專訊】我細細個同阿媽行街市時，佢唔知道係懶或其他原因，總會在街頭間賣菜舖頭買菜，那一個菜檔全澳門人都知道，比其他廉價菜檔足足貴了一倍，阿媽話如果從其他菜檔買菜，割走那些不甚好的枝枝節節之後，其實都是差不多，現在菜檔做埋，自己做少一層功夫，所以阿媽會在那個菜檔買菜。
後來我識得菜檔老闆，佢話畀我知，間舖頭租金好貴，一定要賣靚嘢，正是「人無我有，人有我靚」，如果賣平嘢，一定唔夠其他舖頭鬥平，最後想唔執笠都唔得。
蝕頭容易賺尾難
香港就好似一個在黃金地段的超貴舖頭，如果用嚟賣平嘢，想唔執笠都唔得。不過，總有人是反其道而行，最近有內地連鎖超市嚟香港插旗，可樂只賣兩元一罐，立刻有人話，在香港做超市的人死得，香港人毋須去深圳，都可以買到平貨，當內地超市打抵晒香港零售商之後，在沒有競爭對手之下，慢慢將售價調升，這叫做蝕頭賺尾。
港不靠平 靠品質保證
蝕頭容易賺尾難，據聞那間內地超市曾經將可樂調升至24元10罐，銷量不但立刻下跌，仲受到消費者指摘，就算打抵晒香港所有零售商如何，又唔可以加價，計埋燈油火蠟，賣得多蝕得仲多，生意人唔會長期補貼顧客，見到唔對路就會立刻走人。
當內地平價超市走了之後，香港平價超市就會重生，不過，香港超市不是靠平，而是靠品質保證，收得你的價錢，就唔會畀次貨。所以，不少內地人來港除了飲飲食食之外，仲會買很多日用品，奢侈品，有人覺得奇怪，內地平咁多，點解唔在內地買，要在香港買？簡單來說，香港有品質保證。
紀惠集團行政總裁
[湯文亮 敢說反話]