2024-09-25
明報
【明報專訊】銀行家發表的「蒸魚精神」，引起很大迴響，叫好叫座。老實說，香港人不是有「蒸魚精神」，什麼也不是，究竟什麼是「蒸魚精神」？
一間食肆，負責蒸魚的人其實是打雜，乜都要做，不過是做高級工作，如浸發海味等，所以叫「上雜」。每一條魚大小、厚薄、魚種、爐頭火力各有不同，蒸魚時間亦不同，所以，如果問「上雜」一條黃勒石斑要蒸幾耐，答案是10至15分鐘，究竟是蒸10分鐘還是15分鐘，「上雜」會話睇情况而定。
由於蒸魚出碟時間大約只有10秒，太早出條魚會唔熟；若要翻蒸，魚肉就會變霉；太遲出碟，條魚會太熟，魚肉就會太死太實，唔夠滑就是一條死罪，但一般唔夠經驗的人蒸魚，都寧願取熟不取生，唔夠膽在適當時候出碟。
樓市「上雜」要令市民恢復信心
現在香港樓市就好似一大堆蒸魚的人，明知道條魚已經熟都唔敢出碟，大家明知樓市已經見底，就算外國大行都只是話明年樓價下跌5%。老實說，下跌5%其實是睇好樓市，各項因素改善，例如政府已經「撤辣」，人口增加，租金上升，利息下跌，但仍然唔敢入市。這個時候，有經驗的「上雜」就要出場，如果唔出，樓價仍然會繼續下跌，甚至會跌到殘。
無論地產商或者投資者，如果願意以高價出售一些優質物業，倘若獲得承接，就會令到市民對樓市恢復信心，代表樓市已經見底，但問題是大多數業主都只是希望出售手上的非優質物業，優質的善價而沽，甚至唔打算出售，即是啲魚仍然在蒸爐裏面，最後因為蒸得太耐而魚肉會太實，失去其原有價值。如果樓市沒有「上雜」，到大家對樓市失去信心時，樓價已經跌得太殘，有時候，地產商或者投資者要做出多少犧牲亦在所難免。
紀惠集團行政總裁
[湯文亮 敢說反話]