2024-09-24
明報
【明報專訊】有老友問，香港放債人畀人叫做大耳窿、吸血鬼、財仔等，古代放債人又叫什麼。
我相信唔係好多人知道，古代稱放債人為員外，那些京官告老還鄉之後，手上有多少真金白銀，亦有多少政治地位，又請了不少護院打手，皮費很大，深知「家有二千，每日二錢，全無生計，用得幾年 」，但又唔識做生意，唯有做放債人，如果有耕地，就用耕地做擔保，好似香港財仔一樣。
我都未講完，老友又問，點解那些幾十歲，就嚟瓜得的員外可以娶到十幾歲靚女，老友唔知道，如果有耕地就用耕地做擔保，如果無耕地就用個女做擔保，倘若失收，債仔個女就變咗做員外妾侍，所以，個女愈靚，愈借得多錢，員外醉翁之意不在酒。
有老友近日將自住單位賣走，大家都不是太明白，老友還有其他物業可以賣，點解要賣自住單位，如果畀人知道，一定以為好唔掂才會賣自住單位。
其實，老友較早前等錢用，最方便就係攞比較優質的自住單位去問財仔借錢，不但很容易借到，而且仲比正常為多，如果還得到當然是無問題，但如果還唔到，就好似農夫要將自己最靚個女嫁畀員外做妾侍，老友還唔到錢，財仔就會按正常程序收樓，將單位變成銀主盤之後立刻出售。
自住優質樓勿抵押予財仔
由於是優質單位，早已有買家關注，立刻賣走亦不是難事，所以，自用、自住或者優質物業，千祈唔好畀財仔做抵押品，否則很容易會被賣走。
紀惠集團行政總裁
[湯文亮 敢說反話]